მარშალიშ გეგმა

მარშალიშ გეგმა (ინგლ. Marshall Plan), ოფიციალურო ევროპაშ რეკონსტრუქციაშ პროგრამა (European Recovery Program - ERP) — ააშ-იშ თარი პროგრამა მაჟირა მოსოფელიშ ლჷმაშ უკული ევროპაშ აკოდგინუაშო. ინიციატივას ჯოხოთ გიადჷ ააშ-იშ სახენწჷფო მელამოსე ჯორჯ მარშალიშ პატიოცემელო. გეგმა სახენწჷფო დეპარტამენტიშ წორომოხანდეეფქ დამუშეს, თარო — უილიამ კლეიტონქ დო ჯორჯ კენანქ.

რეკონსტრუქციაშ გეგმაქ დემუშჷ მაკათური ევროპულ სახენწჷფოეფიშ ახვალამას 1947 წანაშ კვირკვეს. ახვალამას სხუნუეფიშ რსხუ დო ბჟაეიოლ ევროპაშ ქიანეფჷთ რდეს მოჭანაფილი, მარა სტალინქ თე გეგმა სხუნუეფშო ოშქურანჯო მირჩქინჷ, ამერიკაშ იმპერიალისტური გეგმა გიოდჷ დო თეშნერო, სხუნუეფიშ ბლოკიშ ქიანეფი ახვალამაშა ვენუშქუმალჷნა. გეგმა იხორციელებუდჷ 1947 წანაშ კვირკვეშე ოთხი წანაშ მეძენას. თე პერიოდის გინოჩამილქ იჸუ $13 მილიარდი აშშ დოლარიშ საღირაშ ეკონომიკური დო ტექნიკური მოხვარა − ნამუთ 2006 წანაშ კურსით $130 მილიარდი ამერიკული დოლარიშ ექვივალენტური რე (ინფლაციაშ გთოლწონებათ). თე ფარაქ მიხვარინჷ თი ევროპაშ ქიანეფს, ნამუეფქჷთ ევროპაშ ეკონომიკური წოროხანდაშ ორგანიზაციას აკათესჷნ.

გეგმაშ გოხორციალაფაშ დალიას, მაკათური ქიანეფიშ (გერმანიაშ მოხ) ეკონომიკაქ თინეფიშ ლჷმაშახიან დონეს გჷწორჷ. მუმალი ჟირი ვითწანურაშ მეძენას ბჟადალი ევროპა გჷიკათუანდჷ უპრეცენდენტო ეკონომიკურ ძინას. მარშალიშ გეგმა მოიარზენდჷ, მუჭოთ ევროპაშ ინტეგრაციაშ ართ-ართი დაჭყაფური ელემენტი, თიშენ, ნამჷ-და თიქ მონწყჷ ტარიფეფი დო ოვაჭარე ბარიერეფი დო გაჭყჷ ინსტიტუტეფი ეკონომიკაშ კოორდინაციაშო კონტინენტურ დონეშა. მარშალიშ გეგმაშ შედეგი რდჷ ამერიკული მართუალაშ ტექნიკაშ სისტემატური მიშაღალა. ბოლო წანეფს კანკალე ისტორიკოსი ეჭვენს მარშალიშ გეგმაშ ოართე ეფექტურობას, მარა თის იშენით მიარზენს, მუჭოთ პოზიტიურ დო წჷმოძინელი სქემას, ნამუქჷთ ევროპა კუჩხის ქეგიორინჷნ.